2013-12-12 12:41
sinta
飛馬搵袋鼠兵 真係基維爾咁把炮？！
太陽飛馬雖然要等南華喺亞冠附加賽過晒3關，先有機會以後補身份參戰亞協盃，但呢支千萬大軍已經急不及待擴軍，而且仲係出戰過世界盃嘅澳洲前鋒，唔通教練陳志康（Cowboy）真係咁把炮，捉到基維爾、艾奇湯臣呢啲袋鼠兵入隊？
港甲1、2哥傑志同南華，為咗準備下年嘅亞協盃同亞冠附加賽，呢排積極擴軍，前者就話有歐霸級人馬加盟，而少林寺就直情簽咗曾效利物浦預備組嘅荷蘭小國腳韋爾。目前喺聯賽踢少一場排第3嘅飛馬，今季班費過千萬，又係爭標分子，當然不甘後人，嗱嗱聲搵番個亞援，填補番韓援金東烈離隊嘅空缺。
一係唔搵，一搵就搵個勁嘅。據知呢位澳洲兵可以踢翼、又可以踢前鋒，Cow sir話︰「佢係一個好有名氣同經驗嘅球員，效力過歐洲頂級球會，亦代表澳洲踢過世界盃。」嘩！效力緊澳職墨爾本雄心嘅基維爾、墨爾本勝利嘅艾奇湯臣、艾加拉法嘅比斯安奴、名古屋鯨魚嘅約舒亞堅尼地……真係是旦一個嚟港甲都係球迷之福啦；當中35歲嘅前利物浦兵基維爾，今季因傷冇乜機會上陣，佢跟「畢基的風」轉戰港甲真係唔係冇可能㗎。雖然Cow sir賣完關子後，點都唔肯講係邊個，但佢話呢個月內有答案︰「其實都傾到最後階段，如果傾得掂，唔使嚟試腳都會即簽。」
[img]http://static.apple.nextmedia.com/images/apple-photos/apple/20131212/large/img0000745_aa05.gif[/img]
■飛馬教練陳志康（左四）噚日對3位試腳新兵表現感滿意。
[b]希斯基前隊友率先到港[/b]
就算真係咁唔好彩，簽唔到呢位國腳級人馬，飛馬噚日晨操亦都有另一位袋鼠兵同兩個韓援試腳。24歲嘅澳洲小國腳馬高積錫，雖然上季因膝傷而冇為紐卡素噴射機上陣，但呢位希斯基前隊友經驗好，Cow sir對佢評價甚高，至於分別踢過韓職慶南FC同泰甲喀比FC嘅徐榮德同金栐份，就有一貫南韓球員嘅速度，個人能力都唔差。除咗亞援，Cow sir話仲會簽多2、3個本地薑，增加板凳深度，應付唔同戰線。
另外，標準流浪總監李輝立噚日否認已經簽咗南華嘅安達同祖爾，話雙方至今未達成任何協議；而事實上佢哋兩個目前仲跟緊少林寺操練，教練張寶春透露球隊暫時只有巴利離隊。
[img]http://static.apple.nextmedia.com/images/apple-photos/apple/20131212/large/img0000740_aa05.gif[/img]
來源:蘋果日報網站