增兵踢亞冠盃　陳七回歸少林寺？

本地班霸南華攞到今屆亞冠盃附加賽席位，雖然要連贏3場作客賽事先入到分組賽，但足主羅傑承話難得有機會踢亞洲最高水平球會賽，講明要加強實力，除咗外援外，仲希望有具份量嘅華將加盟，到底邊個最有份量？據可靠消息透露，陳肇麒（陳七）將會回歸「少林寺」。
話過戒煙嘅陳七喺前季因為俾傳媒影到當街煲煙，加埋帶女去爆房，觸怒一手捧紅佢嘅足主羅傑承，羅生一怒之下同佢解約，搞到阿七最後要返國內加盟中甲廣東日之泉，同港隊中場梁振邦做隊友。

[b]儍邦放假未傾掂[/b]
記得陳七喺告別記者會上忍唔住喊，仲話如果將來有機會，希望可以再幫羅生踢波，最想幫佢攞埋亞協盃。陳七到國內發展季半，第一季先幫日之泉護級，球隊今季一直喺前列，可惜最後一戰輸波，功虧一簣，衝超失敗，但佢自己就入選中甲最佳11人，以內援身份入選到，毫無疑問係一份認同，佢早排仲話下季多數留喺國內發展。
南華之前通過亞洲足協考核成功，升呢踢亞冠盃，就算只係附加賽，仲要作客連過三關先可以入到分組賽；但就造就咗陳七重返南華嘅機會。講真，以南華目前班底，要爭入亞冠盃分組賽難度好大，所以隨即同已約滿日之泉嘅陳肇麒同梁振邦傾回巢，其中陳七考慮咗一段時間，最後決定放棄國內發展嘅機會，再次上山，喺傾掂合約後已經飛咗去度假。
至於梁振邦就未傾掂，最後呢兩位前少林兵係咪齊齊歸位，就要等儍邦喺美國放假返嚟先有答案。我哋問過南華公關，想證實有關陳七回歸嘅消息，佢哋不置可否，只話有新球員加盟會立即公佈。

[img]http://static.apple.nextmedia.com/images/apple-photos/apple/20131204/large/img0000012_aa06.gif[/img]

[b]巴利安達危危乎[/b]
消息人士話，陳七同儍邦喺國內發展年幾，因為唔太適應，好多時踢完周六主場比賽就立即返港，今次有機會回歸少林，幫羅生打江山，絕對唔奇。另外，南華為提升實力踢亞冠盃，目前斟緊3至4個新援，到底隊內7名外援（見附表）邊個有得留低？應該好快有答案。據聞同隊內巴西兵唔多夾嘅前鋒巴利，同近排好少上陣嘅安達極有機會被叮走；另外，迪亞高同祖爾都危危乎。

[img]http://static.apple.nextmedia.com/images/apple-photos/video/20131204/org/1386102179_d6f0.jpg[/img]


來源:蘋果日報網站