滬港盃前傳搵英倫兵　南華玩大佢

南華今晚7點45分就會以港甲冠軍身份，喺滬港球會盃首回合，作客中超排第9嘅上海上港，可唔可以保持不敗就踢過先知。不過，少林寺季中增兵就有聲氣，據外國網站透露，保加利亞班霸索菲亞中央陸軍嘅白賴仁侯活同薛迪比有望加盟南華！（now634台今日7:40pm直播）
南華季初成績麻麻，除輸畀太陽飛馬外，亦和過傑志同元朗，難怪足主羅傑承同擁南躉都唔滿意。羅生早前講明下半季會增兵加強實力，希望喺本地賽同亞協盃爭取好成績。日前有保加利亞足球網站報道，今季加盟索菲亞中央陸軍後得個坐字嘅前英格蘭小國腳白賴仁侯活，將以自由身加盟南華；而名氣大啲、多年前踢過英超史篤城嘅前馬里國腳薛迪比，亦會以借將身份做少林兵。

[b]馬里前鋒曾效史篤城[/b]
雖然呢兩位外援名氣唔及早前嘅畢特同基士文，但都算有來頭，當中出身修咸頓嘅侯活踢過史雲頓、班士利同雷丁等英冠球會；33歲嘅薛迪比05年加盟史篤城後，上陣168場入24球，前兩季仲踢緊英超，到上季先被借到錫周三同燦美爾，今季就轉會索菲亞中央陸軍。不過，南華公關回覆，新援消息不能盡信，總之落實就會公佈。

[b]上海上港唔齊人[/b]
前日起程去咗上海嘅南華，今晚喺滬港球會盃首回合作客上海上港，球隊早前喺比賽場地操咗一課，教練張寶春話當地天氣非常好，場地靚，就算夜晚凍啲，都唔會影響球隊發揮，希望可以和到由前國足教練高洪波領軍嘅上海上港。
主隊今季初升中超，以第9完成聯賽，但主席徐根寶透露，由於球季已完，外援都開始放假，加上國腳前鋒武磊已經向國足報到，所以唔能夠派強陣鬥南華。

[img]http://static.apple.nextmedia.com/images/apple-photos/apple/20131105/large/img0000012_aa06.gif[/img]
■南華抵埗後，即到比賽場地操練，備戰滬港球會盃首回合作客上海上港。圖片由南華提供


來源:蘋果日報網站