卡沙米神級窩利　勁過尹巴士頓？

以為周一場英超獨腳戲水晶宮對富咸戲碼弱冇睇直播嘅球迷，真係走雞嘞，事關富咸中場卡沙米追平嘅美妙窩利入球，英國傳媒更捧為勝過尹巴士頓88年歐國盃決賽嘅金球，富咸最終亦以4:1大勝，拎到今季第3場勝仗。

[b]領富咸反勝水晶宮[/b]
升班馬水晶宮護級形勢水深火熱，賽前只得1勝6負，原本佢哋都有好開始，後衞馬里亞柏接應傳中近門頂入，7分鐘先開紀錄；戰至19分鐘金球出現嘞，富咸中場沙斯查列達後半場長傳，卡沙米跑入水晶宮禁區邊接應，呢位21歲中場先用心口控定，皮球未落地已經用較唔擅長嘅右腳窩利抽入，主隊門將史巴朗尼得個睇字。
英國傳媒就好仔細分析呢個金球，包括卡沙米由中圈跑到禁區頂接應，足足跑咗41碼，射門距離28.3碼，球速就每小時93公里，由射門到入網，只花咗1秒。老一輩球迷應該記得，荷蘭前鋒尹巴士頓88年歐國盃決賽對蘇聯時，係用一個零角度窩利入球，幫橙軍贏到2:0，最後捧埋盃。雖然卡沙米呢球嘅重要性唔及尹巴士頓嗰球，但講難度同勁度，似乎都勝一籌。其實水晶宮反勝為敗真係無話可說，富咸呢場波除咗卡沙米，薛維爾反超前嗰球都好靚，佢喺45分鐘禁區頂勁射入網，換邊後貝碧托夫同辛德路斯各建一功，客軍以4:1大炒，取得兩連勝。

[b]韋舒亞：10月金球冇喇[/b]
富咸領隊祖爾賽後就大讚卡沙米：「呢個金球嘅難度比想像中更高，因為卡沙米係邊跑邊用胸口控球，完全同尹巴士頓唔同，我認為卡沙米呢球更加靚。」阿仙奴中場韋舒亞，上周六同基奧特美妙合作攻破諾域治大門，原本以為有機會爭逐10月英超金球，但睇完卡沙米入球後就認輸，韋舒亞喺twitter留言：「我嘅每月金球獎溜走了！」英超今季真係好多一戰成名小將，繼贊奴沙、安祖斯唐辛後就輪到卡沙米，佢本身都係瑞士國腳，明年出戰世盃就要睇住佢嘞！

[img]http://static.apple.nextmedia.com/images/apple-photos/video/20131023/org/1382472493_d312.jpg[/img]


來源:蘋果日報網站